orthographe non modernisée
Fortis
imaginatio generat casum1, disent les clercs. Je suis de ceux qui sentent très-grand effort de l'imagination. Chacun en
est heurté, mais aucuns en sont renversez. Son impression me perse. Et mon art
est de luy eschapper, non pas de luy resister. Je vivroye de la seule
assistance de personnes saines et gaies. La veuë des angoisses d'autruy
m'angoisse materiellement, et a mon sentiment souvent usurpé le sentiment d'un
tiers. Un tousseur continuel irrite mon poulmon et mon gosier. Je visite plus
mal volontiers les malades ausquels le devoir m'interesse, que ceux ausquels je
m'attens moins, et que je considere moins. Je saisis le mal, que j'estudie, et
le couche en moy. Je ne trouve pas estrange qu'elle donne et les fievres et la
mort à ceux qui la laissent faire et qui luy applaudissent. Simon Thomas
estoit un grand medecin de son temps. Il me souvient que, me rencontrant un jour
à Thoulouse chez un riche vieillard pulmonique, et traittant avec luy des moyens
de sa guarison, il luy dist, que c'en estoit l'un de me donner occasion de me
plaire en sa compagnie, et que, fichant ses yeux sur la frescheur de mon visage et sa pensée sur cette allegresse et vigueur qui regorgeoit de mon adolescence, et remplissant tous ses sens de cet estat florissant en quoy j'estoy lors, son
habitude s'en pourroit amender. Mais il oublioit à dire que la mienne s'en
pourroit empirer aussi.
Gallus Vibius banda si bien son ame à comprendre l'essence et les
mouvemens de la folie, qu'il emporta son jugement hors de son siege, si
qu'onques puis il ne l'y peut remettre; et se pouvoit vanter d'estre devenu fol
par sagesse. Il y en a qui, de frayeur, anticipent la main du bourreau. Et celuy
qu'on debandoit pour luy lire sa grace, se trouva roide mort sur l'eschafaut du
seul coup de son imagination. Nous tressuons, nous tremblons, nous pallissons et rougissons aux secousses de nos imaginations, et renversez dans la plume
sentons nostre corps agité à leur bransle, quelques-fois jusques à en expirer.
Et la jeunesse bouillante s'eschauffe si avant en son harnois, tout' endormie,
qu'elle assouvit en songe ses amoureux desirs,
Ut quasi
transactis sæpe omnibus rebus profundant
Fluminis ingentes fluctus, vestemque cruentent2.
Et encore qu'il
ne soit pas nouveau de voir croistre la nuict des cornes à tel qui ne les avoit
pas en se couchant, toutes-fois l'evenement de Cyppus, Roy d'Italie, est memorable,
lequel pour avoir assisté le jour avec grande affection au combat des taureaux,
et avoir eu en songe toute la nuict des cornes en la teste, les produisit en son
front par la force de l'imagination. La passion donna au fils de Crœsus la
voix, que nature luy avoit refusée. Et Antiochus print la fievre de la beauté
de Stratonicé trop vivement empreinte en son ame. Pline dit avoir veu Lucius
Cossitius de femme changé en homme le jour de ses nopces. Pontanus et d'autres
racontent pareilles metamorphoses advenuës en Italie ces siecles passez. Et par
vehement desir de luy et de sa mere,
Vota puer solvit,
quæ foemina voverat Iphis3.
Passant à Victry
le Françoys, je peuz voir un homme que l'Evesque de Soissons avoit nommé Germain
en confirmation, lequel tous les habitans de là ont cogneu, et veu fille,
jusques à l'aage de vingt deux ans, nommée Marie. Il estoit à cett' heure-là
fort barbu, et vieil, et point marié. Faisant, dict-il, quelque effort en
sautant, ses membres virils se produisirent; et est encore en usage, entre les
filles de là, une chanson, par laquelle elles s'entradvertissent de ne faire
point de grandes enjambees, de peur de devenir garçons, comme Marie Germain. Ce
n'est pas tant de merveille, que cette sorte d'accident se rencontre frequent;
car si l'imagination peut en telles choses, elle est si continuellement et si
vigoureusement attachée à ce subject, que, pour n'avoir si souvent à rechoir en
mesme pensée et aspreté de desir, elle a meilleur compte d'incorporer, une fois
pour toutes, cette virile partie aux filles.
Les uns attribuent à la force de l'imagination les cicatrices du Roy
Dagobert et de Sainct François. On dit que les corps s'en-enlevent telle fois de
leur place. Et Celsus recite d'un Prebstre, qui ravissoit son ame en telle
extase, que le corps en demeuroit longue espace sans respiration et sans
sentiment. Sainct Augustin en nomme un autre, à qui il ne falloit que faire ouïr
des cris lamentables et plaintifs, soudain il defailloit, et s'emportoit si
vivement hors de soy, qu'on avoit beau le tempester, et hurler, et le pincer, et
le griller, jusques à ce qu'il fust resuscité : lors il disoit avoir ouy des
voix, mais comme venant de loing, et s'apercevoit de ses eschaudures et
meurtrissures. Et, que ce ne fust une obstination apostée contre son sentiment,
cela le montroit, qu'il n'avoit cependant ny poulx ny haleine.
Il est vray semblable que le principal credit des
miracles, des visions, des
enchantemens et de tels effects extraordinaires, vienne de la puissance de
l'imagination agissant principalement contre les ames du vulgaire, plus molles.
On leur a si fort saisi la creance, qu'ils pensent voir ce qu'ils ne voyent pas.
Je suis encore de cette opinion, que ces plaisantes liaisons, dequoy nostre
monde se voit si entravé, qu'il ne se parle d'autre chose, ce sont volontiers des
impressions de l'apprehension et de la crainte. Car je sçay par experience, que
tel, de qui je puis respondre comme de moy-mesme, en qui il ne pouvoit choir
soupçon aucun de foiblesse, et aussi peu d'enchantement, ayant ouy faire le
conte à un sien compagnon d'une defaillance extraordinaire, en quoy il estoit
tombé sur le point qu'il en avoit le moins de besoin, se trouvant en pareille
occasion, l'horreur de ce conte luy vint à coup si rudement frapper
l'imagination, qu'il encourut une fortune pareille; et de là en hors fut
subject à y rechoir, ce villain souvenir de son inconvenient le gourmandant et
tyrannisant. Il trouva quelque remede à cette resverie par une autre resverie.
C'est que, advouant luy mesme et preschant avant la main cette sienne
subjection, la contention de son ame se soulageoit sur ce qu'apportant ce mal
comme attendu, son obligation en amoindrissoit, et luy en poisoit moins. Quand
il a eu loy, à son chois (sa pensée desbrouillée et desbandée, son corps se
trouvant en son deu) de le faire lors premierement tenter, saisir, et surprendre
à la cognoissance d'autruy : il s'est guari tout net à l'endroit de ce subjet..
A qui on a esté une fois capable, on n'est plus incapable, si non par
juste foiblesse.
Ce malheur n'est à craindre qu'aux entreprinses où nostre ame se trouve
outre mesure tandue de desir et de respect, et notamment si les commoditez se
rencontrent improveues et pressantes; on n'a pas moyen de se ravoir de ce
trouble. J'en sçay, à qui il a servy d'y apporter le corps mesme commencé à
ressasier
d'ailleurs, pour endormir l'ardeur de cette fureur, et qui par l'aage se trouve
moins impuissant de ce qu'il est moins puissant. Et tel autre à qui il a
servi aussi qu'un amy l'aye asseuré d'estre fourni d'une contrebatterie
d'enchantements certains à le preserver. Il vaut mieux, que je die comment ce
fut. Un comte de très bon lieu, de qui j'estoye fort privé, se mariant avec une
belle dame qui avoit esté poursuivie de tel qui assistoit à la feste, mettoit
en grande peine ses amis et nommément une vieille dame, sa parente, qui
presidoit à ces nopces et les faisoit chez elle, craintive de ces sorcelleries; ce qu'elle me fit entendre. Je la priay s'en reposer sur moy. J'avoye de
fortune en mes coffres certaine petite piece d'or platte, où estoient gravées
quelques figures celestes, contre le coup de soleil et oster la douleur de
teste, la logeant à point sur la cousture du test; et pour l'y tenir, elle
estoit cousue à un ruban propre à rattacher souz le menton. Resverie germaine à
celle de quoy nous parlons. Jacques Peletier, vivant chez moy, m'avoit faict ce
present singulier. J'advisay d'en tirer quelque usage, et dis au comte, qu'il
pourroit courre fortune comme les autres; y ayant là des hommes pour luy en
vouloir prester d'une; mais que hardiment il s'allast coucher; que je luy feroy
un tour d'amy; et n'espargneroys à son besoin un miracle, qui estoit en ma
puissance, pourveu que, sur son honneur, il me promist de le tenir
très fidelement secret; seulement, comme sur la nuict on iroit luy porter le
resveillon, s'il luy estoit mal allé, il me fist un tel signe. Il avoit eu l'ame
et les oreilles si battues, qu'il se trouva lié du trouble de son imagination, et me feit son signe à l'heure susditte. Je luy dis lors à l'oreille, qu'il se
levast souz couleur de nous chasser, et prinst en se jouant la robbe de nuict que j'avoye sur moy (nous estions de taille fort voisine) et s'en vestist, tant
qu'il auroit executé mon ordonnance, qui fut : quand nous serions sortis, qu'il
se retirast à tomber de l'eau; dist trois fois telles oraisons, et fist tels
mouvements; qu'à chascune de ces trois fois, il ceignist le ruban que je luy
mettoys en main, et couchast bien soigneusement la medaille qui y estoit
attachée, sur ses roignons, la figure en telle posture; cela faict, ayant à la
derniere fois bien estreint ce ruban, pour qu'il ne se peust ny desnouer, ny
mouvoir de sa place, que, en toute asseurance, il s'en retournast à son prix faict, et n'oubliast de rejetter ma robbe sur son lict, en maniere qu'elle les
abriast tous deux. Ces singeries sont le principal de l'effect, nostre pensée ne
se pouvant desmesler que moyens si estranges ne viennent de quelqu'abstruse
science. Leur inanité leur donne poids et reverence. Somme, il fut certain que
mes characteres se trouverent plus Veneriens que Solaires, plus en action qu'en
prohibition. Ce fut une humeur prompte et curieuse qui me convia à tel effect,
esloigné de ma nature. Je suis ennemy des actions subtiles et feintes, et hay
la finesse, en mes mains, non seulement recreative, mais aussi profitable. Si
l'action n'est vicieuse, la route l'est.
Amasis Roy d'Ægypte, espousa Laodice, très belle fille Grecque; et luy,
qui se monstroit gentil compagnon par tout ailleurs, se trouva court à jouir
d'elle, et menaça de la tuer, estimant que ce fust quelque sorcerie. Comme és
choses qui consistent en fantasie, elle le rejetta à la devotion, et ayant
faict ses voeus et promesses à Venus, il se trouva divinement remis dés la
premiere nuict, d'empres ses oblations et sacrifices.
Or elles ont tort de nous recueillir de ces contenances mineuses,
querelleuses et fuyardes, qui nous esteignent en nous allumant. La bru de
Pythagoras, disoit que la femme qui se couche avec un homme, doit avec sa cotte
laisser aussy la honte, et la reprendre avec le cotillon. L'ame de
l'assaillant, troublée de plusieurs diverses allarmes, se perd aisement; et à
qui l'imagination a faict une fois souffrir cette honte (et elle ne la fait
souffrir qu'aux premieres accointances, d'autant qu'elles sont plus bouillantes et
aspres, et aussi qu'en cette premiere connoissance, on
craint beaucoup plus de faillir), ayant mal commencé, il entre en fievre et
despit de cet accident qui luy dure aux occasions suivantes.
Les mariez, le temps estant tout leur, ne doivent ny presser, ny taster
leur entreprinse, s'ils ne sont prests; et vault mieux faillir indecemment à
estreiner la couche nuptiale, pleine d'agitation et de fievre, attendant une et
une autre commodité plus privée et moins allarmée, que de tomber en une
perpetuelle misere, pour s'estre estonné et desesperé du premier refus. Avant la
possession prinse, le patient se doit à saillies et divers temps legerement
essayer et offrir, sans se piquer et opiniastrer à se convaincre definitivement
soy-mesme. Ceux qui sçavent leurs membres de nature dociles, qu'ils se soignent
seulement de contre-pipper leur fantasie.
On a raison de remarquer l'indocile liberté de ce membre, s'ingerant si
importunément, lors que nous n'en avons que faire, et defaillant si importunément,
lors que nous en avons le plus affaire, et contestant de l'authorité si
imperieusement avec nostre volonté, refusant avec tant de fierté et
d'obstination noz solicitations et mentales et manuelles. Si toutes-fois en ce
qu'on gourmande sa rebellion, et qu'on en tire preuve de sa condemnation, il m'avoit
payé pour plaider sa cause, à l'adventure mettroy-je en souspeçon noz autres
membres ses compagnons, de luy estre allé dresser, par belle envie de
l'importance et douceur de son usage, cette querelle apostée, et avoir par
complot armé le monde à l'encontre de luy, le chargeant malignement seul de
leur faute commune. Car je vous donne à penser, s'il y a une seule des parties
de nostre corps qui ne refuse à nostre volonté souvent son operation, et qui
souvent ne l'exerce contre nostre volonté. Elles ont chacune des passions
propres, qui les esveillent et endorment, sans nostre congé. A quant de fois
tesmoignent les mouvements forcez de nostre visage les pensées que nous tenions
secrettes, et nous trahissent aux assistants. Cette mesme cause qui anime ce
membre, anime aussi sans nostre sceu le coeur, le poulmon, et le pouls; la veue
d'un object agreable respandant imperceptiblement en nous la flamme d'une
emotion fievreuse. N'y a-il que ces muscles et ces veines, qui s'elevent et se
couchent sans l'adveu, non seulement de nostre volonté, mais aussi de nostre
pensée ? Nous ne commandons pas à noz cheveux de se herisser, et à nostre peau
de fremir de desir ou de crainte. La main se porte souvent où nous ne l'envoyons
pas. La langue se transit, et la voix se fige à son heure. Lors mesme que,
n'ayans de quoy frire, nous le luy deffendrions volontiers, l'appetit de manger
et de boire ne laisse pas d'emouvoir les parties qui luy sont subjettes, ny
plus ny moins que cet autre appetit; et nous abandonne de mesme, hors de
propos, quand bon luy semble. Les utils qui servent à descharger le ventre ont
leurs propres dilatations et compressions, outre et contre nostre advis, comme
ceux-cy destinez à descharger nos roignons. Et ce que pour autorizer la
toute puissance de nostre volonté, Sainct Augustin allegue avoir veu quelqu'un qui
commandoit à son derriere autant de pets qu'il en vouloit, et que Vivès, son
glossateur,
encherit d'un autre exemple de son temps, de pets organisez suivant le ton des
voix qu'on leur prononçoit, ne suppose non plus pure l'obeissance de ce membre;
car en est-il ordinairement de plus indiscret et tumultuaire. Joint que j'en
sçay un, si turbulent et revesche, qu'il y a quarante ans qu'il tient son
maistre à peter d'une haleine et d'une obligation constante et irremittente, et
le menne ainsin à la mort. Et pleust à Dieu, que je ne le sceusse que par les
histoires, combien de fois nostre ventre par le refus d'un seul pet, nous menne
jusques aux portes d'une mort très angoisseuse; et que l'Empereur qui nous
donna liberté de peter partout, nous en eust donné le pouvoir.
Mais nostre volonté, pour les droits de qui nous mettons en avant ce
reproche, combien plus vraysemblablement la pouvons-nous marquer de rebellion
et sedition, par son desreglement et desobeissance ! Veut-elle toujours ce
que nous voudrions qu'elle voulsist ? Ne veut elle pas souvent ce que nous luy
prohibons de vouloir; et à nostre evident dommage ? Se laisse-elle non plus
mener aux conclusions de nostre raison ? En fin, je diroy pour monsieur ma
partie, que « plaise à considerer, qu'en ce faict, sa cause estant inseparablement
conjointe à un consort, et indistinctement, on ne s'addresse pourtant qu'à luy,
et par les argumens et charges telles, veu la condition des parties, qu'elles ne
peuvent aucunement apartenir ni concerner sondit confort. Partant se void
l'animosité et illegalité manifeste des accusateurs. » Quoy qu'il en soit,
protestant que les advocats et juges ont beau quereller et sentencier, nature
tirera cependant son train; qui n'auroit faict que raison, quand ell'auroit
doüé ce membre de quelque particulier privilege, autheur du seul ouvrage
immortel des mortels. Pour tant est à Socrates action divine que la generation;
et amour, desir d'immortalité et Dæmon immortel luy-mesmes.
Tel, à l'adventure par cet effect de l'imagination, laisse icy les
escruelles, que son compagnon raporte en Espaigne. Voylà pourquoy, en telles
choses, l'on a accoustumé de demander une ame preparée. Pourquoy praticquent les
medecins avant main la creance de leur patient avec tant de fausses promesses
de sa guerison, si ce n'est afin que l'effect de l'imagination supplee
l'imposture de leur aposeme ? Ils sçavent qu'un des maistres de ce mestier leur
a laissé par escrit, qu'il s'est trouvé des hommes à qui la seule veuë de la
Medecine faisoit l'operation.
Et tout ce caprice m'est tombé presentement en main, sur le conte que me
faisoit un domestique apotiquaire de feu mon pere, homme simple et Souysse,
nation peu vaine et mensongiere, d'avoir cogneu long temps un marchand à
Toulouse, maladif et subject à la pierre, qui avoit souvent besoing de clysteres;
et se les faisoit diversement ordonner aux medecins, selon l'occurrence de son
mal. Apportez qu'ils estoyent, il n'y avoit rien obmis des formes accoustumées; souvent il tastoit s'ils estoyent trop chauds.
Le voyla couché, renversé, et
toutes les approches faictes, sauf qu'il ne s'y faisoit aucune injection. L'apotiquaire
retiré apres cette ceremonie, le patient accommodé, comme s'il avoit
veritablement pris le clystere, il en sentoit pareil effect à ceux qui les
prennent. Et si le medecin n'en trouvoit l'operation suffisante, il luy en
redonnoit deux ou trois autres, de mesme forme. Mon tesmoin jure, que pour
espargner la despence (car il les payoit, comme s'il les eut receus), la femme de
ce malade ayant quelquefois essayé d'y faire seulement mettre de l'eau tiede, l'effect
en descouvrit la fourbe, et pour avoir trouvé ceux là inutiles, qu'il fausit
revenir à la premiere façon.
Une femme, pensant avoir avalé une espingle avec son pain, crioit et se
tourmentoit comme ayant une douleur insupportable au gosier, où elle pensoit la
sentir arrestée; mais, par ce qu'il n'y avoit ny enfleure ny alteration par le
dehors, un habil'homme, ayant jugé que ce n'estoit que fantasie et opinion, prise
de quelque morceau de pain qui l'avoit piquée en passant, la fit vomir, et
jetta à la desrobée dans ce qu'elle rendit, une espingle tortue. Cette femme,
cuidant l'avoir rendue, se sentit soudain deschargée de sa douleur. Je sçay
qu'un gentil'homme, ayant traicté chez luy une bonne compagnie, se vanta trois ou
quatre jours après, par maniere de jeu (car il n'en estoit rien) de leur avoir
faict menger un chat en paste; dequoy une damoyselle de la troupe print telle
horreur, qu'en estant tombée en un grand dévoyement d'estomac et fievre, il fut
impossible de la sauver. Les bestes mesmes se voyent comme nous subjectes à la
force de l'imagination. Tesmoings les chiens qui se laissent mourir de dueil
de la perte de leurs maistres. Nous les voyons aussi japper et tremousser en
songe, hannir les chevaux et se debattre.
Mais tout cecy se peut raporter à l'estroite cousture de l'esprit et du
corps s'entre-communiquants leurs fortunes. C'est autre chose que
l'imagination agisse quelque fois, non contre son corps seulement, mais contre
le corps d'autruy. Et tout ainsi qu'un corps rejette son mal à son voisin, comme
il se voit en la peste, en la verolle, et au mal des yeux, qui se chargent de
l'un à l'autre :
Dum spectant oculi
læsos, læduntur et ipsi :
Multaque corporibus transitione nocent.4
pareillement,
l'imagination esbranlée avecques vehemence, eslance des traits qui puissent
offencer l'object estrangier. L'ancienneté a tenu de certaines femmes, en
Scythie, qu'animées et courroussées contre quelqu'un, elles le tuoient du seul
regard. Les tortues et les autruches couvent leurs œufs de la seule veuë, signe
qu'ils y ont quelque vertu ejaculatrice. Et quant aux sorciers, on les dit avoir
des yeux offensifs et nuisans,
Nescio quis
teneros oculus mihi fascinat agnos.5
Ce sont pour moy
mauvais respondans, que magiciens. Tant y a que nous voyons par experience les
femmes envoyer aux corps des enfans, qu'elles portent au ventre des marques de
leurs fantasies, tesmoing celle qui engendra le more. Et il fut presenté à
Charles, Roy de Boheme et Empereur, une fille d'aupres de Pise, toute velue et
herissée, que sa mere disoit avoir esté ainsi conceuë, à cause d'une image de
Sainct Jean Baptiste pendue en son lict. Des animaux il en est de mesmes, tesmoing les brebis de Jacob, et les perdris et
les lievres, que la neige blanchit
aux montaignes. On vit dernierement chez moy un chat guestant un oyseau au hault
d'un arbre, et, s'estans fichez la veuë ferme l'un contre l'autre quelque espace
de temps, l'oyseau s'estre laissé choir comme mort entre les pates du chat, ou
ennyvré par sa propre imagination, ou attiré par quelque force attractive du
chat. Ceux qui ayment la volerie ont ouy faire le conte du fauconnier qui,
arrestant obstinément sa veuë contre un milan en l'air, gageoit de la seule
force de sa veuë le ramener contre-bas : et le faisoit, à ce qu'on dit. Car les
Histoires que j'emprunte, je les renvoye sur la conscience de ceux de qui je les
prens.
Les discours sont à moy, et se tiennent par la preuve de la raison, non
de l'experience; chacun y peut joindre ses exemples : et qui n'en a point,
qu'il ne laisse pas de croire qu'il en est, veu le nombre et varieté des
accidens.
Si je ne comme6 bien, qu'un autre comme pour moy.
Aussi en l'estude que je
traitte, de noz moeurs et mouvements, les tesmoignages fabuleux, pourveu qu'ils
soient possibles, y servent comme les vrais. Advenu ou non advenu, à Paris ou à
Rome, à Jean ou à Pierre, c'est tousjours un tour de l'humaine capacité, duquel je suis utilement advisé par ce recit. Je le voy et en fay mon profit egalement en
ombre que en corps. Et aux diverses leçons qu'ont souvent les
histoires, je prens à me servir de celle qui est la plus rare et memorable. Il y
a des autheurs desquels la fin c'est dire les evenements. La mienne, si j'y
scavoye advenir, seroit dire sur ce qui peut advenir. Il est justement permis
aux escholes, de supposer des similitudes, quand ilz n'en ont point. Je n'en fay
pas ainsi pourtant, et surpasse de ce costé-là en religion superstitieuse toute foy historialle. Aux exemples que je tire ceans, de ce que j'ay leu, ouï,
faict, ou dict, je me suis defendu d'oser alterer jusques aux plus legieres et
inutiles circonstances. Ma conscience ne falsifie pas un iota, ma science je
ne sçay. Sur ce propos, j'entre par fois en pensée qu'il puisse asses bien
convenir à un Theologien, à un philosophe, et telles gens d'exquise et exacte
conscience et prudence, d'escrire l'histoire. Comment peuvent-ils engager leur
foy sur une foy populaire ? Comment respondre des pensées de personnes incognues et donner pour argent contant leurs conjectures ? Des actions à divers
membres, qui se passent en leur presence, ils refuseroient d'en rendre
tesmoignage, assermentez par un juge; et n'ont homme si familier, des intentions
duquel ils entreprennent de pleinement respondre. Je tiens moins hazardeux d'escrire
les choses passées, que presentes; d'autant que l'escrivain n'a à rendre compte
que d'une verité empruntée. Aucuns me convient d'escrire les affaires de mon
temps, estimants que je les voy d'une veuë moins blessée de passion qu'un
autre, et de plus près, pour l'accez que fortune m'a donné aux chefs de divers
partis. Mais ils ne disent pas que, pour la gloire de Salluste, je n'en prendroys
pas la peine; ennemy juré d'obligation, d'assiduité, de constance; qu'il n'est
rien si contraire à mon stile qu'une narration estendue : je me recouppe si
souvent, à faute d'haleine, je n'ay ny composition, ny explication qui vaille, ignorant au-delà d'un enfant des frases et vocables qui servent aux choses
plus communes; pourtant ay-je prins à dire ce que je sçay dire, accommodant la matiere à ma force;
si j'en prenois qui me guidast, ma mesure pourroit faillir à
la sienne; que ma liberté, estant si libre, j'eusse publié des jugements, à mon
gré mesme, et selon raison, illegitimes et punissables. Plutarche nous diroit
volontiers de ce qu'il en a faict, que c'est l'ouvrage d'autruy que ses
exemples soient en tout et par tout veritables; qu'ils soient utiles à la posterité, et presentez d'un lustre qui nous esclaire à la vertu, que c'est son
ouvrage. Il n'est pas dangereux, comme en une drogue medicinale, en un compte
ancien, qu'il soit ainsin ou ainsi.
1-
"Une forte imagination produit l'événement".
2- "Dans l'illusion
d'avoir consommé l'acte, on répand à larges flots cette liqueur et on en
souille son vêtement." (Lucrèce, De Natura rerum, IV, 1029)
3- "Iphis
acquitta, garçon, des vœux qu'il avait faits étant femme." (Ovide,
Métamorphoses, IX, 793).
4- "En regardant des yeux
malades, les yeux deviennent malades à leur tour, et beaucoup de misères se
transmettent ainsi d'un corps à l'autre ." (Ovide,
Remedia amoris, V, 615).
5-
"Je ne sais quel œil fascine mes tendres agneaux." (Virgile,
Eglogues, III, 103).
6- commente.
